📜 Daily Prasang 📜

 📜 Daily Prasang 📜

•       એકવાર શ્રી ગોપાળાનંદ સ્વામી ભાલના ગામ ભોળાદમાં પધાર્યા હતા. તે ગામમાં એક પટેલના ઘરે એક પવિત્ર બ્રાહ્મણ કથા વાંચતા હતા. ત્યારે એ પટેલે તેમને કહ્યું કે, ગોર મહારાજ, જો તમારે કથા કરવી હોય તો આ સ્વામિનારાયણની નવા પંથની કંઠી તોડી નાખો.

•     ત્યારે બ્રાહ્મણ કહે કે, મુખીબાપા, આ મારા ઇષ્ટદેવની કંઠી તો મારા માથા સાટે છે. ત્યારે એ પટેલ કહે તો અમારે તમારી પાસે કથા કરાવવી નથી. એમ કહીને એ ગોરમહારાજને તુંરત જ રજા દીધી.

•         પછી તે વાત કોઈક હરિભક્તે શ્રી ગોપાળાનંદ સ્વામીને આવીને કહી. તે વખતે ગામનો એ પટેલ પણ સ્વામી સન્મુખ સહુ સાથે ત્યાંજ બેઠો હતો.

•       પછી સ્વામીએ કહ્યું, 'પટેલ, કથા કરનાર વ્યાસજીનું સ્વરુપ કહેવાય! તમે વ્યાસજીનું અપમાન કેમ કર્યું ? તમે કથાકાર બ્રાહ્મણનું અપમાન નથી કર્યું પણ વ્યાસજીનું અપમાન કર્યું છે ! માટે તમને એક જમ તેડવા આવશે.         
•      ત્યારે પટેલ ઉદ્ધતાઇથી કહે કે, એક જમને તો હું મારી નાખીશ.

•     ત્યારે ગોપાળાનંદ સ્વામી કહે, તો બે જમ આવશે.

•    ત્યારે એ પટેલ ધમંડથી કહે કે "એકને હું મારીશ અને બીજાને મારો ભાઈ મારશે."

•       આ વાતને થોડા દિવસ થયા ત્યાં તો તેનું ભવિષ્ય આવીને ઊભું રહ્યું.

•       એ પટેલનો અંતકાળ આવ્યો તે વખતે ગામનાં બૈરા તળાવે પાણી ભરતાં હતાં. તેમણે છેટેથી જમને ભાળ્યા એટલે માથેથી પાણીનાં બેડાં પડી ગયાં અને ચીસો પાડવા લાગ્યાં અને સૌને મૂર્છા આવી ગઈ.

•      પછી તે યમદૂતોએ પટેલને ઘેર જઈને કહ્યું જે અમે તને લેવા આવ્યા છીએ. તારે મારવા હોય તો માર્ય ! ત્યારે પટેલ તો વિકરાળ યમદૂતને ભાળીને કાંઈ બોલી શક્યા નહિ. પછી યમના દૂતો તેને એક ગાઉ સુધી સ્થૂળ દેહ સાથે ઢસડી ગયા. જે આખા ગામના માણસોએ નજરે જોયું. ગામના સીમાડે તેના દેહને પડતું મેલી જીવને જમપુરીમાં લઈ ગયા. 

• આમ મોટા સંતની મર્યાદા મૂકતાં એનો જીવ યમપુરીના કષ્ટને પામ્યો.

• 
  
• - સદગુરૂ શ્રી ગોપાળાનંદ સ્વામીના જીવન કવનમાંથી....🙏🏻